“Azərbaycan Dəmir Yolları” QSC (ADY) Çinin CRRC Zhuzhou Locomotive şirkəti ilə 4 yeni sərnişin qatarının alınması barədə müqavilə imzalayıb. Sənədi ADY-nin sədri Rövşən Rüstəmov və CRRC Zhuzhou Locomotive şirkətinin rəhbəri imzalayıblar. Müqaviləyə görə, qatarlar 2 il ərzində Azərbaycana gətiriləcək.
Qatarlar necə olacaq?
- Növ: elektrik qatarı, hər biri 7 vaqondan ibarət;
- Uzunluq: təxminən 135 metr;
- Tutum: 434 sərnişin yeri;
- Siniflər: birinci, biznes və standart;
- Sürət: istismar sürəti saatda 140 km, layihə sürəti 160 km.
Qatarlarda müasir rahatlıq şəraiti və hərəkət imkanları məhdud olan sərnişinlər üçün həllər nəzərdə tutulub.
Hansı xətlərdə işləyəcək?
ADY 2030-cu ilə qədər Yalama, Mincivan və Astara istiqamətlərində sərnişin daşımalarını mərhələli şəkildə bərpa etməyi planlaşdırır. Bundan əlavə, əvvəlcədən planlaşdırıldığı kimi Bakı–Xankəndi marşrutu da istifadəyə veriləcək.
Turizm üçün nə dəyişəcək?
Şimalda Yalama, cənubda Astara xətlərinin bərpası bu bölgələrin turizm və iqtisadi potensialından daha geniş istifadəyə imkan yaradacaq. Yay mövsümündə Xəzər sahilinə, Quba–Xaçmaz zonasına və Lənkəran–Astara bölgəsinə gedən turistlər üçün qatar avtomobil yoluna rahat alternativ ola bilər.
Dəmir yolu bağlantısının genişlənməsi daxili turizmin artmasına, bölgələrdə yerli bizneslərin canlanmasına və iqtisadi fəallığın yüksəlməsinə də təkan verəcək.
Parkın yenilənməsi davam edir
Bu, ADY-nin Çinlə bu il imzaladığı ilk müqavilə deyil. İyun ayında CRRC Ziyang şirkəti ilə 4 magistral sərnişin lokomotivinin alınmasına dair müqavilə bağlanıb. Ötən ay isə Çindən 7 yük lokomotivi gətirilib, daha 14-ünün gətirilməsi planlaşdırılır.
Bakı şəhərinin nəqliyyat infrastrukturu üzrə 2025–2030-cu illər Dövlət Proqramı çərçivəsində şəhərlərarası marşrutlar üçün 20 sərnişin qatarı və 50 yataq tipli sərnişin vaqonunun alınması ilə bağlı danışıqlar da aparılır.
